ALIKIBA AKABIDHIWA TUZO YAKE YA MTV EMA BEST AFRICAN ACT

Imeandaliwa na Trend

Hatimaye msanii wa muziki wa Bongo Flava, Ali Kiba amekabidhiwa tuzo yake ya MTV EMA aliyoshinda kwenye kipengele cha 'Best African Act' ambayo alikabidhiwa kimakosa msanii kutoka nchini Nigeria, Wizkid.

Utata uliibuka baada ya mfumo uliokuwa unatumika kumpata mshindi ukiwataka mashabiki kupiga kura kwa msanii wanaempendekeza kuwa mshindi kwa njia ya mtandao kuonyesha kuwa Ali Kiba kutoka nchini Tanzania ndiye alishinda  lakini MTV BASE AFRICA wakamtangaza na kumkabidhi tuzo hiyo Wizkid.

Baada ya kelele za mashabiki pamoja na malalamiko kutoka kwa msanii huyo na menejimenti yake kuhusu tukio walilofanyiwa, hatimaye waandaaji walijirudi na kukiri kuwa ni kweli wamefanya makosa. Walirekebisha ushindi huo, na kuomba radhi kwa kitendo hicho na kumtangaza King Kiba kuwa ndiye anastahili tuzo hiyo.

Leo hii King Kiba ame-'post' kupitia ukurasa wake wa mtandao wa Instagram kuwa anawashukuru MTV BASE AFRICA kwa kumkabidhi tuzo hiyo. Pia hakusita kuonyesha shukrani zake za dhati kwa familia, uongozi na mashabiki wake kwa kusimama naye pamoja mpaka kukabidhiwa kile alichostahili.

Pongezi kwa Ali Kiba na uongozi wake kwa kuendelea kufanya kazi nzuri, kushinda tuzo mbalimbali za kimataifa na kuieletea sifa Tanzania.